پانچواں سالانہ اسلامک کوئز کمپٹیشن و عید ملن سماروہ کا انعقاد

تقسیم انعامات کا ایک منظر

اسکول و کالج کے بچے اور بچیوں میں دینی تعلیمات کو عام کرنے کے لئے گزشتہ برسوں کی طرح اس برس بھی ہیلپنگ ہینڈ مظفرہ کی جانب سے سالانہ اسلامک کوئز کمپٹیشن کا انعقاد کیا گیا۔ اس سال کوئز کمپٹیشن کے ساتھ برادران وطن کی قربت، اسلامی تہذیب میں ان کو شریک کرنے اور امن و بھائی چارگی کو فروغ دینے کے لئے عید ملن سماروہ کا بھی انعقاد کیا گیا۔

پانچواں اسلامک کوئز کمپٹیشن عیدگاہ مظفرہ میں ۲ شوال ۱۴۴۳ ھ مطابق 4 مئی 2022 بروز بدھ منعقد ہوا۔ اس کوئز کمپٹیشن کی صدارت جنرل سیکریٹری جمعیت علماء بیگوسرائے مولانا صابر نظامی صاحب قاسمی نے کی، اس پروگرام کے مشرف مولانا غالب اسراری ندوی تھے۔ حکم کے فرائض مولانا ضیاء الامین خان ندوی اور مولانا ظہیر الاسلام مظاہری نے انجام دئے۔ کوئز کی پہلی نشست کا آغاز مولانا طفیل احمد قاسمی کی تلاوت سے ہوا، جبکہ دوسری نشست میں تلاوت قاری توصیف نے کی۔ کمپٹیشن کی نظامت مولانا مظہر الحق قاسمی نے کی۔

سامعین و مساہمین

کوئز میں ضلع بیگوسرائے کے مختلف علاقوں سے بڑی تعداد میں اسکول و کالج کے طلبہ وطالبات نے حصہ لے کر سوالات کے جوابات دئے، دلچسپی کے لئے وقتاً فوقتاً سامعین سے بھی سوالات کئے گئے اور درست جواب دینے والوں کو فوری انعامات سے نوازا گیا۔ تمام مساہمین کو تشجیعی انعامات اور پوزیشن حاصل کرنے والوں کو خصوصی انعامات سے نوازا گیا۔

تقسیم انعامات سے قبل حکم صاحبان اور موجود علماء کرام نے اپنے تاثرات و خطابات سے سامعین کو مستفید فرمایا۔

کوئز کمپٹیشن کے کنوینر مولانا کلام رضا فیضی نے ہیلپنگ کا تعارف اور اس کے مقاصد پر روشنی ڈالتے ہوئے کہا کہ اس گروپ کا نام اور کام قرآن و حدیث سے مستفاد ہے۔ وہ تمام آیتیں اور احادیث جن میں انسانیت کی خدمت نفع رسانی اور فلاح کی بات کہی گئی ہے وہ ہیلپنگ ہینڈ کا مینی فیسٹو (manifesto) ہے۔

غربت کا خاتمہ، تعلیم کا فروغ، انصاف کا قیام اور ترقی کی راہ پر کوشش اس گروپ کے چند بنیادی مقاصد میں سے ہیں۔ انھوں نے مزید کہا کہ آج اسلامک کوئز کمپٹیشن کا انعقاد بھی گروپ کے ایک اہم مقصد تعلیم کے فروغ کے تحت ہو رہا ہے۔ انھوں نے موجود سامعین بطور خاص ہیلپنگ ہینڈ کے تمام ممبران کا شکریہ ادا کیا اور مبارکباد پیش کی۔

مولانا مظہر الحق قاسمی نے ہیلپنگ ہینڈ کی جانب سے اسلامک کوئز کے انعقاد کو سراہا اور اس کے کارکنان کو مبارکباد پیش کی، انھوں نے مزید فرمایا کہ اس پروگرام سے نہ صرف اسکول و کالج کے مسلم طلبہ میں دینی تعلیم سے دلچسپی بڑھ رہی ہے۔ بلکہ غیر مسلم طلبہ بھی متاثر ہو رہے ہیں۔ واضح رہے کہ غیر مسلم طلبہ و طالبات کی ایک جماعت نے اس پروگرام کو براہ راست دیکھا۔

مہمان خصوصی مولانا غالب اسراری ندوی نے کہا کہ اس طرح کے پروگرام بہت اہم ہیں، اس کا سلسلہ جاری رہنا چاہیے ، اور عوام الناس کو اس پروگرام کے انعقاد میں اور دیگر فلاحی و رفاہی کاموں میں ہر طرح سے بڑھ چڑھ کر حصہ لینا چاہئے۔ 

عید ملن سماروہ میں برادران وطن سے خطاب کرتے ہوئے مولانا ضیاء الامین خان ندوی چترویدی نے کہا کہ انسانیت کی کامیابی مذہبی کتابوں پر عمل کرنے میں ہے، تمام مذاہب کی کتابیں اچھائیوں کا حکم دیتی ہیں اور برائیوں سے روکتی ہیں، قرآن مجید ان تمام مذہبی کتابوں میں سب سے آخری مکمل اور جامع مذہبی کتاب ہے۔ لہذا تمام مذاہب کے ماننے والوں کو چاہیے کہ وہ اپنی مذہبی کتاب کے ساتھ آخری اور کامل مذہبی کتاب قرآن مجید کو بھی پڑھیں اور اپنے معاشرہ کو سب مل کر ایک مثالی معاشرہ بنائیں۔

عید ملن سماروہ میں شریک برادران وطن

صدر محترم نے اپنے صدارتی خطاب میں کہا کہ دین کی محنت مختلف طریقوں سے ہو رہی ہے، مکاتب و مدارس میں دین کی آبیاری ہو رہی ہے مگر اسلامک کوئز کا انداز بالکل مختلف ہے، اس کے ذریعہ ایسے طلبہ جو دینی علوم سے بالکل ناواقف ہیں، اور جن تک دینی تعلیمات کو پہونچانا مشکل ہے، ان تک آسان انداز میں دینی تعلیمات کو عام کرنے کی کوشش ہو رہی، جس سے ہر عام و خاص طلبہ فائدہ اٹھا رہے ہیں۔ انھوں نے آئندہ اسلامک کوئز کے پروگرام کا ایک منظم خاکہ بھی پیش کیا جس سے مزید طلبہ و طالبات مستفید ہو سکیں۔صدر محترم نے سامعین کے سوالات کا جواب بھی دیا اور سوال سے متعلق برمحل رہنمائی فرمائی۔

تمام طلبہ کو تشجیعی اور پوزیشن حاصل کرنے والے مساہمین کو خصوصی انعامات سے سرفراز کرنے کے بعد صدر محترم کی دعاء کے ساتھ پروگرام کا اختتام ہوا۔