جامعہ اسلامیہ اعظم گڑھ میں سالانہ مسابقہ خطابت کا انعقاد

جامعہ اسلامیہ اعظم گڑھ میں سالانہ مسابقہ خطابت کا انعقاد کیا گیا۔ مسابقہ کی صدارت جناب مولانا محمد ارشد قاسمی مدنی صاحب مد ظلہ العالی نے کی۔ فن خطابت کی اہمیت پر روشنی ڈالتے ہوئے صدر علی وقار  نے اپنے کلیدی خطاب میں کہا کہ خطابت انقلاب پیدا کرنے کا ذریعہ ہے، دل کی دنیا کو زیر و زبر کرنے کا مؤثر ترین آلہ ہے۔گمراہ فرقوں کو جواب دینے کا ایک اہم ذریعہ خطابت ہے۔

شاہ ولی اللہ محدث دہلوی نے قرآن میں صراحتا مذکور علوم کو پانچ حصوں میں تقسیم کیا ہے، ان میں ایک اہم علم گمراہ فرقوں کا رد اور اس کا جواب دینا ہے۔

 خطابت گمراہ فرقوں کو جواب دینے کا ایک اہم ذریعہ ہے، اسی لیے موسیٰ علیہ السلام نے اللہ سے درخواست کی تھی کہ میرے بھائی ہارون کو میرا مددگار بنا دیا جائے تاکہ فصاحت کے ساتھ مدعو قوم کو خطاب کیا جا سکے۔

فصیح خطابت سامعین پر جادو سا اثر کرتی ہے۔ قبیلہ بنو تمیم کے دو آدمیوں نے تقریر کی، دونوں نے اپنے اپنے مفاخر بیان کیے، خود کو خوب بڑھا چڑھا کر بیان کیا، صحابہ کو تعجب ہوا، اس پر حضور صلی اللّٰہ علیہ وسلم نے فرمایا کہ بعض بیان جادو کی طرح اثر کرتے ہیں۔ بیان اگر اخلاص سے کیا جائے اور فصاحت و بلاغت کا خیال رکھا جائے تو اس کا  دل پر بڑا اثر ہوتا ہے۔ 

مؤثر تقریر کے لیے دو اہم باتوں کا خیال رکھیں۔

اول بہتر مواد:

ایک تو مواد ہونا چاہئے، اور اس کا بڑا ذخیرہ قرآن و حدیث مل سکتا ہے، قرآن کے حافظ ہوں، اور تلاوت کی کثرت سے استحضار بڑھتا جاتا ہے۔ پھر احادیث کی طرف رجوع کریں، اس کے علاوہ مختلف دینی کتب کا مطالعہ کریں۔

دوم نیت کی اصلاح:

 مواد خواہ کتنا بھی بہتر ہو، تقریر اگر برائے تقریر ہے تو وہ تقریر مؤثر نہیں ہوگی، دل سے جو بات نکلتی ہے اثر رکھتی ہے، اس لیے ہر بیان سے پہلے مواد کی تیاری کے بعد نیت کی اصلاح نہایت ضروری ہے۔

مذکورہ باتوں کا اظہار مولانا موصوف نے جامعہ اسلامیہ مظفرپور، اعظم گڑھ میں سالانہ جلسہ خطابت کے موقع پر فرمائی، اس مسابقہ میں  مولانا مناظر منعم رحمانی، مولانا عالمگیر ندوہ اور راقم السطور نے حکم کے فرائض انجام دیے۔ مساہمین کے علاوہ  طلبہ و اساتذہ کی ایک بڑی تعداد شریک جلسہ رہی۔ علی مرتضی، خالد معید اور محبوب عالم نے بالترتیب اول، دوم اور سوم پوزیشن حاصل کی۔

واضح رہے کہ جامعہ اسلامیہ اعظم گڑھ بہترین تعلیم و تربیت، نظم و نسق، ادب و ثقافت، خوبصورت طرز تعمیر میں اپنی مثال آپ ہے۔ یہاں حفظ کے علاوہ عالمیت تک دارالعلوم ندوۃ العلماء کے نصاب کے مطابق تعلیم ہوتی ہے، اس کے علاوہ شعبہ افتاء، شعبہ بحث و تحقیق، شاندار لائبریری اور باصلاحیت و با اخلاق اساتذہ کی ٹیم جامعہ کی معنویت میں غیر معمولی اِضافہ کرتی ہے۔ 

  🖊️:فیضی ندوی