مؤرخہ 25 / مارچ 2022 مطابق 21 شعبان 1443ھ بروز: جمعہ خیر النساء بہتر ہال ندوہ روڈ، لکھنؤ میں اللقاء الثقافی، لکھنؤ کی سالانہ تقریب تقسیم انعامات و توصیفی اسناد کا انعقاد ہوا، جس میں اللقاء الثقافی، لکھنؤ کے عہدیداران و ممبران، طلبہ و اسکالرز اور مستفدین و وابستگان کو انعامات اور توصیفی و اعزازی اسناد سے نوازا گیا۔ اس باوقار سالانہ تقریب میں طلباء و اسکالرس نے مختلف عناوین پر نمائندہ مضامین و مقالات، تبصرے ترجمے اور نظمیں پیش کیں، جن سے شرکاء بہت محظوظ ہوئے۔
نامور محقق فیصل احمد ندوی ( استاذ دارالعلوم ندوۃ العلماء ، لکھنؤ ) نے دار البحث والاعلام، لکھنؤ کی علمی و ادبی کاوشوں کے تئیں اپنی قدر دانی اور مسرت کا اظہار کرتے ہوئے فرمایا کہ: " ندوۃ العلماء جن متعین اہداف اور بلند ترین مقاصد کےلیے قائم ہوا تھا، دارالبحث والاعلام، لکھنؤ اپنے پلیٹ فارم سے ان کی بعض اہم جہات پر کام کر رہا ہے، جس کی شدید ضرورت ہے۔ زمانہ شناسی، زمانہ کے ساتھ ہم آہنگی، حالات سے باخبری اور ذرائع ابلاغ جیسے سے دیگر اہم شعبوں کے لیے افراد سازی ایک قابل قدر کام ہے۔ مولانا نے وقت کی پابندی اور اس کے درست استعمال پر بھی خصوصی توجہ مبذول کرائی.
تقریب کے مہمانِ خصوصی پروفیسر محمد ادریس قاسمی ندوی (اسسٹنٹ پروفیسر شعبۂ عربی، لکھنؤ یونیورسٹی) نے طلبہ و اسکالرز کے تعلیمی مظاہرے اور نظم و ضبط کو خوب سراہا، مزید آپ نے اس کی ضرورت و اہمیت پر روشنی ڈالتے ہوئے ارباب اختصاص سے سے کسب و استفادہ کی خصوصی تلقین کی۔ مفتی رحمت اللہ ندوی ( استاذ دارالعلوم ندوۃ العلماء، لکھنؤ ) نے اپنے خطاب میں کہا کہ: " تنوع کے ساتھ توازن و اعتدال لازمی ہے"، مزید فرمایا کہ: "مقالہ نگار اپنے علم میں گہرائی پیدا کریں اور حوالے کے اہتمام کو لازم پکڑیں"۔
اس کے علاوہ اسکالرز: قمر الزمان ندوی، کے۔ آر۔ فیضی اور ضیاء الرحمن کریمی ندوی نے اللقاء الثقافی، لکھنؤ کی علمی خدمات پر روشنی ڈالی اور اس کے علمی و ثقافتی سرمایوں کی حفاظت، نشر و اشاعت اور اللقاء کے تمام شرکاء و مستفدین کی تنظیم ِ نو کا عزم ظاہر کیا۔ محمد مرغوب الرحمن ندوی ( جنرل سکریٹری: اللقاء الثقافی، لکھنؤ ) نے شرکاء خدمت میں اللقاء الثقافی، لکھنؤ کی 2020 تا 2022 کی مفصل رپورٹ پیش کی۔
تقسیم انعامات کا سیشن بہت حوصلہ افزا رہا، جس میں سب سے پہلے عہدیداران کو مہمان خصوصی مولانا فیصل احمد ندوی بھٹکلی اور معزز مہمان مفتی رحمت اللہ ندوی نے اپنے دست مبارک سے شیلڈ کے علاوہ کتاب، ڈائری اور قلم پر مشتمل فائل سے نوازا۔ اس کے بعد اسکالرز، وابستگان اور سرگرم طلبہ کی عزت افزائی؛ مختلف مہمانوں کے دست مبارک سے میڈل اور فائل دے کر کی گئی۔
تقریب کی نظامت کرتے ہوئے ہوئے دارالبحث والاعلام، لکھنؤ کے ڈائریکٹر مسعود عالم ندوی نے تمام مہمانانِ گرامی قدر اور شرکاء کا شکریہ ادا کرتے ہوئے کہا کہ: " اللقاء الثقافی،لکھنؤ ایک ایسا علمی و فکری اور میدانی پلیٹ فارم ہے؛ جو ماہرین کی رہنمائی، ایکٹو گروپس کے تعاون اور فعال اداروں کے اشتراک سے زبان و ادب، فکر اسلامی، تاریخ، علومِ شرعیہ، ملکی و بین الاقوامی قانون، تدریس و تحقیق، صحافت و ابلاغ، استقبال و ترسیل وفود، نظم و انتظام، کیریئر کونسلنگ، گائیڈنس جیسے اہم شعبوں میں گذشتہ ایک دہائی سے سرگرم عمل ہے، اس یونٹ کی کوکھ سے اب تک دسیوں تعلیمی و سماجی یونٹ نکل کر میدانِ عمل میں مصروف کار ہیں۔ اس باوقار علمی اور تربیتی پلیٹ فارم کی قدر افزائی کےلیے ہم آپ کے شکر گزار ہیں"۔
کلمات تشکر اور دعائے ماثورہ کے ساتھ تقریب کا اختتام ہوا۔
*بقلم: مرزا ریحان بیگ*
*( سکریٹری: اللقاء الثقافی، لکھنؤ )*
25/03/2022۔
تبصرے
ایک تبصرہ شائع کریں