ملک میں اقلیتوں کےحقوق کی پاسداری ضروری :تسنیم فرزانہ

(طلبہ اور اسکالرز کےلئے تخلیقی اور تربیتی سیریز کی دوسری نشست کا خیر النساء بہتر ہال میں کامیاب انعقاد)

دارالبحث والاعلام - لکھنؤ کی ہفت روزہ علمی، ادبی اور فکری یونٹ اللقاء الثقافى - لکھنؤ کے زیر اہتمام جامعہ خدیجۃ الکبری للبنات ندوہ روڈ، لکھنؤ کے خیر النساء بہتر ہال میں 2021/ 12/ 24ء مطابق 19/جمادی الاولی 1443ھ بروز: جمعہ بوقت: 08:00 - 09:00 بجے دن طلبہ اور نوجوان اسکالرز کے لیے ايک نئی تخلیقی سیریز بعنوان:

میرا انتخاب، میری تخلیق

میری تخلیق، میرا انتخاب

کی دوسری نشست کا انعقاد عمل میں آیا، جس کی ابتدا محمد شاہ ظفر کی تلاوت سے ہوئی، محمد شاہنواز نے مشہور عربی اہل قلم مصطفی لطفی منفلوطی کی ادبی تصنیف العبرات سے مارگریٹ (مرغریت) کی ڈائری کا وه حصه پیش کیا، جو خط و کتابت پر مشتمل ہے، جس میں ڈائری نویس نے اپنے دوست ارمان کے ساتھ بیتے ہوئے ایام کی روداد بیان کرتے ہوئے، لمبی جدائیگی اور طویل علالت کے بعد دوبارہ ملنے کی خواہش ظاہر کی ہے۔ واقعی ڈائری کا یہ حصہ بہت مؤثر اور تعبیر سے دلچسپی رکھنے والے شائقین ادب کے لیے نہایت سبق آموز ہے۔

مرزا ریحان بیگ نے اپنا رواں عربی روزنامچہ پیش کیا، جس میں قلمکار نے اپنی صبح و شام اور لکھنؤ میں استاد محترم مسعود عالم ندوی (حفظہ اللہ!) کی معیت میں قیام کا دلکش نقشہ کھینچا ہے اور مربی گرامی قدر کی علمی و فکری رہنمائی پر ہدیہ تشکر پیش کیا ہے۔

مرغوب الرحمن ندوی نے معروف عالم دین، مایۂ ناز مفکر ومحقق پروفیسر محسن عثمانی ندوی کی شہرۂ آفاق کتاب مشاہیر علوم اسلامیہ اور مفکرین و مصلحین پر اپنا وقیع تبصرہ اور مرتب کا سوانحی خاکہ پیش کیا، جس سے مبصر کی علمى کاوش اور ذوق نظر کی عکاسی ہو رہی تھی، اسی طرح محمد عزیر نے اپنے موئے قلم سے ایک یادگار علمی نشست کی روداد بیان کی، جس سے نوخیز قلمکار کے ادبی ذوق اور فکری نشستوں کی افادیت وعظمت کی خوشبو آرہی تھی.

مسعود عالم ندوی (ڈائریکٹر : دارالبحث والأعلام۔ لکھنؤ۔) نے ھادیہ ای۔ میگزین کے یوٹیوب چینل سے گروپ ڈسکشن پر مشتمل ایک ویڈیو بعنوان :نیا تبدیل شدہ قانون شادی کی عمر کم از کم 21/سال ۔ کا انتخاب پیش کیا، جس میں قانون، نفسیات، میڈیکل اور نسائی ضروریات کی تکمیل سے وابستہ ماہر فن خواتین اس حساس موضوع پر اظہار خیال کررہی تھیں۔ مولانا نے شرکاء نشست کو اسی چینل سے ایک آڈیو بعنوان: ملک میں اقلیتوں کے حقوق اور ان کی پاسداری بھی سنایا، جس کی قلم کار : تسنیم فرزانہ اور وائس اوور: نزہت سہیل پاشا تھیں. مذکورہ یوٹیوب چینل کا تعارف کراتے ہوۓ مزید فرمایا: میڈیا میں خواتین کی فعالیت کے حوالہ سے یہ ایک مثالی چینل ہے، خواتين کے مسائل کو زیر بحث لانا، ان کو حل کرنا، اسلام اور مسلم سماج پر اٹھنے والے اعتراضات کے اثر سے مسلم خواتین کو بچانا اور دیگر متعلقه امور میں رہنمائی فراہم کرنا اس ای- میگزین کے مقاصد ہیں. واضح رہے کہ ہادیہ ای۔میگزین کے مشمولات میں اخلاقی، سیاسی، نظریاتی، فکری مضامین، صحت و صلاح، ادب، تربیت اولاد، شخصیت و نفسیات، آرٹس اور کلچر بھی شامل ہیں۔ جو نئی نسل اور تعلیم یافتہ خواتین کی صلاحیتوں کو جلا بخشنے کے لیے ایک نمونه کا پلیٹ فارم ہے۔

اس موقع پر عبداللہ فیصل، عبدالرحمن فیصل، عبد العلی اور محمد رضوان بھی موجود تھے۔

واضح رہے کہ اس کامیاب علمی، ادبی، فکری، تصویری، ابلاغی اور تربیتی نشست کی نظامت اللقاء الثقافی کے جنرل سکریٹری محمد مرغوب الرحمن ندوی نے کی۔ سوال وجواب اور تاثرات و تصحیح کے سیشن سے بھی خوب استفادہ کیا گیا، جس سے محفل کا حسن دوبالا ہوگیا۔

دعائے ماثورہ اور کلمات تشکر پر نشست کا اختتام ہوا۔